قصة شخصية جدا اول مرة احكيها على بعض وفخور بيها.. انفصال مامتي عن والدي ﻷنه بيجمع كل صفات الشر والعنف كان من أهم الحاجات اللي حصلت في حياتي وقدرت جمالها و ثمارها اني بقيت انسان أحسن في المستقبل.. وقتها لقيت نفسي فجأة بقيت مسئول عن اخواتي (انا اكبر منهم بـ6 سنين) مع ماما في التربية والمصاريف ولقيت مسؤوليات كبيرة على كتافي واصرار اني عايز اساعد ماما ولازم أخواتي تكون فرصهم احسن.. بعد أول \ تاني سنة جامعة أخدت أول قرار مهم في حياتي بنفسي إني أسيب الجامعة عشان مش مستريح لجودة التعليم وعشان لازم اصرف على نفسي وابدأ شغل اساعد كمان في مصاريف العائلة وتعليم اخواتي مع ماما.. قررت افتح سايبر كافيه بعد ما اشتغلت شوية في سنترال ومكتبة ومطعم، وأسست أول سايبر قائم على برمجيات حرة مفتوحة المصدر وفي نفس الوقت قررت إني هكون إبن التعليم الذاتي والمنزلي وهعمل مناهج لنفسي في مجالات مختلفة أحب ادرسها واعلم نفسي بنفسي. عملت كده لمدة 6 سنين. درست لوحدي علوم حاسبات ومعلومات ودرست فنون التعمية والرياضيات، ودرست فيزياء زائد قانون دولي لحقوق الإنسان وفي الاخر درست شوية اعلام وصحافة. كنت بشتغل في السايبر بالنهار وبذاكر بليل. بعد مرور سنين، لقيت نفسي فجأة جزء من تطوير مناهج دراسية في كليات ومدارس وبدي محاضرات في جامعات وبشتغل مع شركات تقنية كبيرة والناس كلها معتقدة اني معايا دكتوراه وماجستير وانا الحقيقي بنفس المقياس النظامي انا متسرب من التعليم ومعايا ثانوية عامة.. من 4 سنين حبيت أسس نفسي لسوق العمل الأوروبي والأمريكي، قررت اني اخش اختبارات صعبة الناس زي حالتي بتعملها لو عرفت انجح فيها وأثبت قدام اللجنة المشكلة من خبراء دوليين في تخصصات كوكتيل إني عندي خبرة قوية في علوم التكنولوجيا والكمبيوتر هيدوني حق العمل الرسمي والاعتراف اني ينفع اشتغل في مجالي بخبرتي الذاتية مش بشهادات. كنت فخور فشخ يوم ما عرفت اني نجحت واستلمت حق العمل والاعتراف ان خبرتي تساوي سنين دراسات عندهم.. طبعا مساري كان صعب ومشوار اعتمد على جهود ذاتية ودعم أمي ليا في كل اختياراتي وانا فخور وممتن للتنشئة دي اللي غيرت حياتي من وقتها. بعد السايبر وشوية مذاكرة قررت اني اشتغل في منظمات المجتمع المدني والصحافة وإني أوظف شغفي وخبرتي في التكنولوجيا في مجال حقوق الإنسان.. وبعد وقت قصير جتلي احسن فرصة شغل ممكن اتمناها وانا عيل وقتها في 2008\2009 مع ناس عندها بوصلة قوية وتشجع على الابتكار والإبداع دون تردد: المبادرة المصرية للحقوق الشخصية. في كل مساراتي كنت ممتن اني بلاقي نفسي مع ناس شاطرة وجميلة وبتشجع على النجاح المشترك بإخلاص ومحبة والخروج برا الصندوق. اول وتاني صورة من 2009 في شغلي والصورة التالتة من تدريب كنت بعمله في 5 ابريل 2010 عن توظيف التقنيات في التوثيق والحفاظ على المعلومات في مركز هشام مبارك للقانون. وقتها برده عمو أحمد سيف كان بيحبني باخلاص ويقولي بهزار دايما انت عامل زي ابني كده مش فاهم بتقولوه ايه بس هو شكله مهم تعالي هنا.. وانا اقوله بضحك خلي بالك ابنك هو اللي بعتني اصلا.
* الحكي لاجل التعافي * محدش يسألني زيادة * المشاركة على اد الطاقة*
