 |
 |
| [قضيت فترات بصلح جسمي] |
وزني وصل ١٢٥ كيلو على مشاكل غضروف وصدرية وكوليسترول، كنت دبدوب بكرش ثري دي بسند عليه الكيبورد والشاي. المهم، بدأت رحلتي في التعافي خطوات صغيرة، تكريس كل وقتي في تحسين وتطوير حالتي النفسية والبدنية ومعاها الروحانية.. مزيج من الرسم، والتليون، والرقص، والطبلة، والملاكمة، وتاي تشي، وسكاي دايفينج انا فتحت باب الطيارة ونطيت كذا مرة، وسباحة، وركوب عجل يوميا، وجري، وتسلق.. بس حقيقي من كل التجارب دي اكتر حاجة دخلت فيها بقوة ومزاج هي رياضة الكاليسثنكس، واهم حاجة عملتها اني اخدت التعافي بدوام كامل واقصى التزام اقدر عليه. مكنش ينفع أتعامل مع التعافي كم ساعة في الاسبوع، ولا كم يوم في الشهر، لا كان لازم كل يوم كل يوم انا هخف وهكون أحسن. انا هخف بس كده.
غيرت تماما نظامي الغذائي باكل ايه بشرب ايه امتي وازاي والكميات، بدأت اعمل ميديتيشن وخصصت وقت للروحانيات كل يوم، حسنت جودة نومي. ببساطة اشتغلت على جودة حياة احسن ليا، حاوطت نفسي بناس جميلة، وافكار أجمل وعادات صحية. النهارده تحولت من ذلك الدبوب الجميل المكتئب اللي كان مليان افكار وحشة ام كرش ماشي لوحده الي بلاطة سكس باكس وتريض يوميا. وعلى فكرة كل العضلات والليونة طبيعي مية في المية (انا من جماعة الطبيعي احسن ويكسبك اكتر) بعد التزام سنتين كل يوم بتمرن وبريح صح وبشرب يوميا ٤ لتر مياة.
حالتي النفسية حمدالله بقيت شاطر في ضبط ايقاع مزاجي وازاي اكون مبسوط في ابسط الاشياء وبكل الاشياء. اكتشفت في الرحلة اني على طيف اضطراب نقص الانتباه وفرط النشاط.. فهمت ليه بصحى الصبح يوميا بطاقة كلب جولدن ريتريفر لازم اطلع اجري اعوم العب اي حاجة والا هعقد اعيط على جنب. في النهاية احب اشكر الدبوب الجميل انك جبتني هنا النهارده ولولاك غالبا مكنتش هبقي انسان بيسعى وراء الجمال والصمود.. انا بقيت احسن بسببي وانا ساعدتني اخف.
ممتن جدا لنفسي، وممتن اكتر لكل الناس اللي ساعدتني بالتشجيع وادوني امل في رحلتي، منهم ناس كتير هنا على فيسبوك برده شاركوا رحلتهم ومحاولاتهم وحسيت بيهم انا مش لوحدي. وجزء اساسي ليه بحكي؟ عشان انت مش لوحدك.. احنا موجودين سوى في الدنيا ندي بعض امل وحب وطاقة ونساعد بعض ونتعلم من تجاربنا.
عمري ما تصورت في يوم اني ممكن اعمل كل ده بس كنت مصدق اني عايز اخف وهدفي اكون احسن.. انت كمان تقدر وانتي كمان تقدري. من سنتين كده اثناء رحلة العلاج النفسي كتبت سلسلة تدوينات بعنان حكي لاجل التعافي عشان اساعد نفسي واساعد غيري اطلع اللي جوايا وابني نفسي، حوالي ٩ او ١٠ تدوينات. الناس اللي في مشوار تعافي وعندها طاقة، أو الناس الجميلة المهتمة بالحياة وبتسعى وراء حياة افضل التدونيات موجودين هنا - مع الآخذ في الاعتبار الكلام تقيل شوية مش سهل وكانت ايام ظالمة... بس الاهم ان التعافي ممكن. لو تحبوا تتابعوني على انستجرام ندردش.
 |
| (اللي وصلت له في ٢٠٢٥) |
 |
| (تاني جزء في المشوار بتعافي من كذا جراحة بين مستشفيات ومراكز تأهيل) |
 |
(أصعب فترة.. اول المشوار بزق نفسي) |