انا عارف من 4 سنين تقريبا أن حالتي النفسية والذهنية في انحدار تدريجي ﻷسباب كوكتيل ووصلت بيا لمنطقة مؤلمة وسيئة جدا اكلتني.. كنت فاهم إني محتاج وعايز أسخر وقت وجهد وفلوس عشان اشتغل على إعادة تأهيلي. اشتغلت زي المجنون في تخصصي وحرقت نفسي في الشغل عشان احوش فلوس كفاية تخليني اخذ سنة واحدة كاملة وقت مستقطع من الشغل اتفرغ كليا لإعادة تأهيل نفسي وجسدي وذهني. عايز اكمل حياة وانا قوي وقادر اساعد غيري والاقي أمل في أبسط الأشياء وعشان اكون قادر لازم اعمل ده لنفسي.. وبدأت أعمله. استقلت من كل الشغلانات وخرجت من كل الدواير والعلاقات الاجتماعية اللي اذتني واحتفظت بقدر من العمل التطوعي القريب لقلبي. قبل ما اعمل الطلعة دي قعدت سنة ونص بعمل اجتماعات مع تقريبا 12 أخصائي نفسي ومعالج بدني وأطباء رعاية شامل من العالم من مدارس طبية ونفسية مختلفة (جنوب أفريقيا / أرجنتين / لبنان / مصر / كوستاريكا / هولندا / أمريكا) عشان اتعلم وافهم أنماط العلاج ومفاتيح كل مدرسة.. مش عايز امشي ورا نموذج بعينه وانا احسن شخص يساعدني وعارف مريت بايه وعايز اتعرف على المدارس واشوف الانسب ليا.. على مدار 15 شهر تقريبا من اجتماعات وقراءة في التأهيل الذهني والنفسي وتحويش فلوس شهريا صممت لنفسي برنامج إعادة تأهيل مكون من مسار نفسي ومسار ذهني ومسار بدني مستمر لمدة 12 شهر وعملت برنامج تخارج من كل حاجة كنت بتعاطها على مدار 16 أسبوع. استقلت في ديسمبر وراجعت البرنامج مع الاستشاريين اللي فشختهم مناقشات وأسئلة.. كانوا واثقين فيا وشجعوني رغم المخاطرة والمجازفة اللي نبهوني ليها وفكروني اد ايه محتاج التزام صارم وتخطيط كويس لكل التوقعات.. وبدأت المشوار.. وصلت لهنا في أغسطس وبشارك معاكم بمحبة وتردد. الصورة: كنت كتبت الجمل دي لنفسي ولقيتها.. كتبتها في نص مشوار التعافي في لحظة صعبة ووقتها اخدت صورة ماسكها عشان تساعدني افكر نفسي كنت فين وبقيت فين واحب اوصل لفين… دلوقت عندي شجاعة اشارك رسالتي للذات مع الناس من باب التشجيع لنفسي ولغيري
* الحكي لاجل التعافي * محدش يسألني زيادة *
