الجمل دي مكنش سهل عليا اكتبها واشاركها وفي لحظات من الكتابة كنت بدمع أمل وخوف وتوتر وتأثر بكلام الناس وحبها.. ناس كتير اعرفها ومعرفهاش تواصلوا معايا اخر كم أسبوع وقالولي: انا كمان بحاول.. وحكولي تجاربهم.. وبدأنا نشارك بعض رحلتنا في العلاج والتعافي. بكل الفروق في ظروفنا وتجاربنا ومجالات الحياة في آخر المطاف كلنا مرينا برحلة مشاعر متقاربة وخلاط. وعشان اشجع نفسي، وعشان اشجع غيري قررت اني اتكلم اكتر على ما اد ما اقدر عن رحلتي مع التعافي.. حاول يبقي عندك تقدير للحكي ومتسألنيش تفاصيل عشان ده مرهق ومش بيساعد.. السبب الرئيسي اني اشجع غيري: التعافي طلع ممكن حتى لو شكله وهمي وصعب وخيال علمي وغرقانين في نقطة مظلمة. لو فقدتوا أمل في الحياة ونفسكم زي انا ما حصل معايا ودرجات من الاكتئاب ومشاكل مصاحبة بقيت جزء من حياتنا عايز اقولكم ده مش اخر الطريق وانتم مش لوحدكم. انا في اخر 4 سنين اتحط عليا جامد بالطول والعرض على مستويات مختلفة وحصلي أزمات صحية وذهنية ونفسية مش سهلة وفقدت حاجات جوهرية في حياتي والتعافي مشوار شامل مش إجراء ميكانيكي. انا غرقت كليا في تروما الفقدان والهزيمة، واكتئاب سياسي وعزلة اجتماعية، وتوديع ناس مهمة ليا، ودخلت في المخدرات وعلاقات اجتماعية مؤذية وبقي عندي برج مشاكل اكلني تماما أسوأها هو غضبي البركان، الأمن رخم عليا اكتر من مرة باشكال مختلفة بسبب شغلي في كذا دولة. بوصلتي ضاعت خالص ومبقتش قادر احس بقيمة أي حاجة معنوية أو مادية.. فقدت أي جدوى لنفسي.. بعد صراع مع نفسي وتهالك جسمي وعقلي تدريجيا بدأت امشي خطوات صغيرة اتجاه نفسي وده الجزء الأهم في حكايتي وتطوري. قابلت أخصائيين نفسيين، ومعالجين، وأطباء رعاية شاملة، وأطباء فيزيو ومدربي رياضات وفنون مختلفة من دول كتير في العالم عشان أجمع أراء وأفكار. عملت عشرات الاجتماعات عشرات الساعات وبعدين قررت إني أعمل لنفسي نظام تعافي شامل جسدي\نفسي\ذهني. احاسيس مختلفة ساعدتني أخد الخطوة: لازم اطور منظوري للأمور ونفسي بشكل أوسع - ادراكي ان الحكاوي لازم تطلع بأي طريقة حركية أو إلقاء مباشر أو استرجاع مع مختصين - انا عيل صغير علي اللي بيحصل ولسه عندي كتير اتعلمه واعمله وناس عايز أحيا بحبها - مفيش داعي تجميل الكلمات ولازم أقول الحاجات زي ما هي زي ما بحسها مش لازم الف دواير واتكلم بفلاتر - حب الناس ومحبتهم ليا ولعائلتي مصدر أمل ومصدر ثقتي في نفسي ودافع ان لازم نساند بعض ونفتكر وجود كل الناس الجميلة دي أكبر دليل أن العالم له جماله واننا نستحق حياة أفضل ومش هقبل بواقع مؤذي عشان خاطر اختي واخويا وأمي وصحابي اللي في السجن وصحابي اللي مش عارفين يرجعوا وعشان لو حبيت اخلف عيال تعيش حياة أكرم واعرف احبهم من قلبي واديهم طاقة حب ابدا - وجع القلب في حقوق الإنسان والسياسة و الجانب المظلم في التكنولوجيا لازم يحصل وده جزء من الانخراط واختياري حتى لو شغال في ملاهي هيبقي في مشاكل - وانا مش هقدر اساعد اي حد ولا هقدر احضن اي حد لو مش ناوي اساعد نفسي واخد بالي من نفسي الاول… وعشان كده انا اختفيت كم سنة من على النت ورجعت من كم شهر. لازم اشحن طاقتي واخلي ذهني صافي عشان اقدر اكون موجود لنفسي في وقعات واحباطات هتيجي واكون موجود لغيري. الحياة صعبة مش سهلة والواقع بتاعنا والعالم مليء بحاجات محبطة وزحام زي القاهرة، بس انا مش عايز اكون خجلان من مشاكلي واكتئابي والتروما جزء مني عايش بيها وراسي مرفوعة وبنتعلم منها ويلا نطلع لقدام عشان هنقابل حاجات غريبة وجميلة ومش لازم اكون سوداوي ودارك موود عشان الزعل والحزن يبقي ليهم معنى احنا ممكن نعبر عن كل ده بصور كتير ومفيش صورة نمطية واحدة للتعبير عن أي شعور. انا عايز اعيش السنين الجاية من كل قلبي عايز افتكر واعيش مشاعر ضحك حب حزن عياط رقص تضامن سعادة طبخ مزيكا سباحة مساعدة غرباء تعلم لغات بناء انترنت والناس اللي ظلمتني ولسه بتظلم مش هخليهم يغيروا جوهري.. انا بدأت ارجع احب نفسي وتقديري للحياة مهما انكسرت قبل كده وكحيت خرا. بصوا من الاخر صعب فشخ نعيش في العالم ده بدون شوية اكتئاب وحزن عشان احنا بني ادمين عندنا مشاعر بنحب وبنخاف وعشان كده لازم نساعد نفسنا عشان نعرف نكمل بعزيمة وأمل، الوقعات مش غلط والخوف ممكن يكون مصدر الهام. انا قعدت سنين بستخبى من مشاكلي ومش مدرك انها بتاكلني بالتصوير البطيء وعملت عبيط لغاية ما فرقعت في وشي. افتكروا انتم مش لوحدكم والحياة قيمتها بيكم، وافكر نفسي معاكم انا مش لوحدي. وزي ما بنروح عند أطباء في تخصصات طبية لما بنكون عيانين وتعبانين في كمان حاجة اسمها اخصائي نفسي \ اخصائية نفسية \ وأطباء نفسيين ومعالجين. مفيش خجل مفيش غلط فيه اعتناء ورعاية بروحكم، وعادي ممكن منحبش الأخصائي ونغيره بعد جلستين مش غلط برده كل حد له اسلوبه زي اي طبيب في أي مجال، والتعافي له اشكال كتير منها التعافي بالكلام المباشر، التعافي بالرياضة والتعافي بالمزيكا والتعافي بالكتابة والرسم والتعافي بالحركة واي حاجة ممكن تساعد الشخص انه يعبر عن طاقته ويطلع لقدام بإدراك وهوية وفخر.. خدوا خطوة صغيرة اتجاه نفسكم وابدأوا اتمشوا بالراحة خلي عندكم أمل اتجاه نفسكم حتى لو مش مقتنعين وصدقوني الارادة جواكم قوية وحاضرة محتاجة مساحة وحب للذات..