مدونة رامي رؤوف حليم

 لما بدأت التفكير في التعافي كنت وقتها بعافر جامد مع الاكتئاب وخارج من كذا جراحة بهدلوني نفسيا اكتر من جسديا.. كنت محتاج اكون في محيط مألوف وامان فكان منطقي بالنسبالي ان البحر يكون البداية. انا اتربيت على البحر وعشت على البحر كل طفوتلي ونشئتي، والبحر بالنسبالي مكان امان وراحة نفسية. وبالفعل بدايتي مع رحلة التعافي والرياضة كانت في البحر. اخترت رياضات مائية اتعلمها اساعد ذهني وجسمي.. الرياضات المائية على اد مهي مسلية جدا بس هي برده مش اسهل حاجة ومحتاجة في الاساس قوة تحكم ذهني وارادة قبل قوة بدنية.. هدوء النفس وترويض ذهنك في وسط البحر ما بين اليقظة والاسترخاء بيساعدك تتغلب على الخوف وبيبني ثقة في النفس ودي حاجات انا كنت محتاجها قوي الي جانب اعادة بناء جسمي كله.. اتعلمت تجديف وسباحة وركوب امواج، عملت روتين لمدة سنة كاملة والتزمت به كنت بتمرن عوم وتجديف على الاقل ٤ مرات في الاسبوع، وكل كم اسبوع ركوب امواج. وشوية شوية بقيت شاطر وثقتي في نفسي بقيت احسن بكتير ومبقتش خايف زي الاول.. شكرت البحر على مساندته ليا وانه كان فعلا ونيس في لحظات نفسية صعبة على مدار سنة كاملة فيها نجاحات واخفاقات معا...

انا عموما بزهق من الروتين واي حاجة فيها تكرار، مبحبش الهوايات والرياضات اللي فيها تنظيم وقواعد كتير. احب ادي المساحة كاملة لجسمي والحرية لعقلي، خصوصا اني بلعب رياضة من باب التعافي والصحة النفسية مش عشان اخش بطولات وابقي بيج رامي (مع كل حبي واحترامي) انا بعمل ده عشان افضل رشيق وصحي ذهنيا وجسديا لغاية ما اوصل ١٠٠ سنة. والرياضة حجر اساس والاهم الصحة الغذائية وبناكل ايه (دي حاجة هتكلم عنها بعدين). عشان كده بحب جدا الكاليستنكس واليوجا كل يوم فيه حركات جديدة وكل شوية جسمك بيتقدم ومعاه افاق تمارين متنوعة اكتر واكتر، كل يوم مختلف عن اللي قبله. انا مثبت في حياتي #كاليستنكس و #يوجا حاجات أساسية، وجنبهم من باب التغيير والترفيه في ٣ رياضات بحبهم وبعملهم لما بزهق او عايز اجدد طاقتي: ركوب العجل - بوكسينج - الترامبولين. اشجعكم جدا توسعوا دايرة اهتمامكم واتعلموا كذا رياضة في نفس الوقت هتوسعوا وتنوعوا القدرة الحركية لجسمكم ويساعدك تطور كتير عن ما تكون بعمل حاجة واحدة بس. حاولوا حبوا اكتر من حاجة اعملوها على مدار الشهر جربوا رياضات كتير من باب الاكتشاف وتشوفوا هتحسوا ازاي وهتحبوا ايه. النهارده الصبح الس...

كنت قررت من فترة ان لازم اقلل الوقت الإجمالي في اليوم اللي بيروح على شاشات (موبيل/ لابتوب / تلفزيون) عشان اقلل مصادر التوتر والانفعال ولو احاول استبدله برسم وتلوين وتمارين منزلية يبقي جميل. مع شوية مثابرة والتزام  وصلت لحته جميله.. دلوقت بقالي ٤ شهر  بدون تلفزيون كل يوم بقفل الموبيل على ٨ أو ٨ ونص بنام الساعه ٩ونص وبصحى مع بداية الفجر. لما بصحى بعمل ٢٠ ضغط ٢٠ بطن ٢٠ سكوات ١٠ عقلة وتمارين تمدد ٥ دقايق و ١٠ دقايق تمارين تنفس مع قراءة أدعية صباحية، وساعات اول ما اصحى بنزل علطول على اي مساحة شوية خضرا واعمل الروتنين هناك.. كل ده بياخد حوالي ٣٠ دقيقة وبحس بعدها اني مستعد ليوم جديد والعالم حواليا.. بصرف النظر عن مزاجي وصاحي ازاي لازم اعمل كدا..  لازم اول أصحى على الريق ٢٠ ضغط يليها ٣ دقايق راحة ثم ٢٠ بطن يليها ٣ دقايق راحة ثم ٣٠ سكوات ثم ١٠ عقلة يليها ٥ دقايق راحة، ثم عيد لو تقدر. بداية جميلة جدا لليوم... لو انتم كمان حابين تجربةا كده ابدأوا بخمس عددات فقط لكل حاجة او تلاتة كمان.. انا قعدت اول شهر لما بدأت كنت بعمل كل يوم خمسة ضغط خمسة بطن وهكذا شوية شوية بدون ما اضغط على نفسي ...

  الفاكهة والمكسرات من أهم وأجمل المصادر الطبيعية لمكونات كتير عشان جسمك وقلبك وروحك، مفيدة جدا في حياة الناس اللي بتلعب رياضة، بس كمان الفواكه والمكسرات بتساهم جدا جدا في ضبط مزاجك العام (المود) وتقليل التوتر والعصبية، افتكر دايما لما تبقي زعلان او مدايق اشرب مياة كتير وبراحة. وعموما عود نفسك كل يوم تشرب على الاقل ٤ لتر يعني ببساطة ٨ كوبايات مياه كبيرة على مدار اليوم.

كل الحاجات في الصورة  ا عتمدت عليها على مدار اخر ٣-٤ سنين، وجبتها  عشان ابدأ رحلتي في التعافي والتريض . ده ركن رياضة الكالستنكس اللي انا عامله عندي في البيت. للي يحبوا يبدؤوا دي الأدوات والفوائد من تجربتي. قبل ما اخش في القائمة عايز بس اقول ملحوظة كل الحاجات متاحة بأسعار مناسبة وفي منها بدائل مختلفة في السوق.. اهم حاجة تمشي نفسك متخليش نقص اي حاجة يوقفك ومش لازم تجيب اغلى حاجة هات حاجات تبدأ بها التجربة ولو مشيت في الرحلة ٤ شهور تقدر تحسن من الجودة وهكذا.. استغل الموارد المتاحة معاك وخليك ملتزم وتوازن بين التريض والراحة.  آخر نقطة في اللستة جبتها بعد بناء خبرة سنة ونص عبارة عن جهاز طبي متخصص، مكلف شوية، ولكنه رهيب، بقترح برده مفيش داعي تجيبوه غير بعد الالتزام بسنة واحدة على الأقل في الكالستنكس وممكن تجيبه هدية لنفسك - هينقلك لمستوى ممتاز ويساعدك جدا جدا في السنة الثانية والثالثة ليك. يلا نخش في الموضوع: دكة تمارين قابلة للتعديل 🛋️🏋️: بتتظبط حسب نوع التمرين، الدكة اللي في النص انا حاطط عليها قماش برتقالي للراحة، الدكة مثالية للبنش، البطن، والظهر. ملحق تمرين الرجلين ...

مفيش اي حد حقيقي هيساعدك غير نفسك.. صدقني مهما كان القاع مظلم وحاسس الحياة متهالكة احضن نفسك طمن نفسك وامسك ايدك خطوات صغيرة. ده عبارة عن مجموعة صور كل واحد بيحكي رحلتي في التعافي والصحة النفسية والبدنية على مدار اخر ٤ سنين عملت فيهم ٣ عمليات جراحية منهم اثنين في رجلي اليمين كان جالي كذا تمزق في الغضروف، واستئصال الزايدة لانها كانت على وشك تعمل بووم. كنت بعارف جامد مع الاكتئاب والتروما، وحالتي النفسية كانت متهالكة تماما ومعاها جسمي وروحي... [قضيت فترات بصلح جسمي] وزني وصل ١٢٥ كيلو على مشاكل غضروف وصدرية وكوليسترول، كنت دبدوب بكرش ثري دي بسند عليه الكيبورد والشاي. المهم، بدأت رحلتي في التعافي خطوات صغيرة، تكريس كل وقتي في تحسين وتطوير حالتي النفسية والبدنية ومعاها الروحانية.. مزيج من الرسم، والتليون، والرقص، والطبلة، والملاكمة، وتاي تشي، وسكاي دايفينج انا فتحت باب الطيارة ونطيت كذا مرة، وسباحة، وركوب عجل يوميا، وجري، وتسلق..  بس حقيقي من كل التجارب دي اكتر حاجة دخلت فيها بقوة ومزاج هي رياضة الكاليسثنكس، واهم حاجة عملتها اني اخدت التعافي بدوام كامل واقصى التزام اقدر عليه. مكنش ...