لما بدأت التفكير في التعافي كنت وقتها بعافر جامد مع الاكتئاب وخارج من كذا جراحة بهدلوني نفسيا اكتر من جسديا.. كنت محتاج اكون في محيط مألوف وامان فكان منطقي بالنسبالي ان البحر يكون البداية. انا اتربيت على البحر وعشت على البحر كل طفوتلي ونشئتي، والبحر بالنسبالي مكان امان وراحة نفسية. وبالفعل بدايتي مع رحلة التعافي والرياضة كانت في البحر. اخترت رياضات مائية اتعلمها اساعد ذهني وجسمي.. الرياضات المائية على اد مهي مسلية جدا بس هي برده مش اسهل حاجة ومحتاجة في الاساس قوة تحكم ذهني وارادة قبل قوة بدنية.. هدوء النفس وترويض ذهنك في وسط البحر ما بين اليقظة والاسترخاء بيساعدك تتغلب على الخوف وبيبني ثقة في النفس ودي حاجات انا كنت محتاجها قوي الي جانب اعادة بناء جسمي كله.. اتعلمت تجديف وسباحة وركوب امواج، عملت روتين لمدة سنة كاملة والتزمت به كنت بتمرن عوم وتجديف على الاقل ٤ مرات في الاسبوع، وكل كم اسبوع ركوب امواج. وشوية شوية بقيت شاطر وثقتي في نفسي بقيت احسن بكتير ومبقتش خايف زي الاول.. شكرت البحر على مساندته ليا وانه كان فعلا ونيس في لحظات نفسية صعبة على مدار سنة كاملة فيها نجاحات واخفاقات معاه.. قررت بعدها اهتم بجودة حياتي.. اتعلمت الطبخ اتمرنت للنط من الطيارات وعملت كذا سكاي دايفنج وركوب العجل مئات الكيلومترات، وخلال ده كله اكتشفت حاجة اسمها #الكاليستنكس وبدأت رحلتي مع التعافي بتفرغ تام وتركيز كامل واخترتها عشان دي مش رياضة بدنية بس ده نهج واسلوب حياة بتتعلم مهارات تتعامل مع حالتك الجسدية والنفسية والذهنية والغذائية، وعشان تتعافي وتتحسن وتطور وتنمو مهم تشتغل على المعبد كله على بعضه مش حته منه بس. الكاليستنكس هتساعدك تبني عضلات وتوصل لدرجات ليونة عالية وتبقي رشيق وتتنفس احسن وتنام احسن ببساطة الكاليستنكس هتساعدك توصل لاحسن نسخة منك. وعلى فكرة كلمة كاليستنكس مصطلح إغريقي مكون من قسمين الاول كالوس معناه الجمال والتاني ستينوس معناه القوة.. فن استخدام الجسم كمقاومة من أجل التطوير والجمع بين جمال الحركة وقوة الجسم. من واقع خبرتي، احب انصح واشجع الناس اللي بتمر بوقت صعب فكروا في الحركة والرياضة كوسيط للتعافي.. واقترح سباحة مرتين تلاتة في الاسبوع، او ابدأ في الكاليستنكس شوية شوية والجميل مقيش اي داعي تشتري حاجة ولا اشتراكات الاعتماد بس على وزن جسمك والالتزام، غير كده وتقدر تبدأ تتمرن في بيتك في اوضة النوم في الصالة كل يوم ٥ دقايق.
